საკომუნიკაციო კომპანია ”ჯეონეთი” მომხმარებლებს ახალ პროდუქტს VPS ჰოსტინგს სთავაზობს. აღნიშნული პროდუქტის მომხმარებლებს საშუალება ეძლევათ, ”ჯეონეთის” დატაცენტრში ჰქონდეთ საკუთარი ვირტუალური სერვერი, რომელის აღჭურვილია ყველა იმ უპირატესობით, რაც გამოყოფილ სერვერს აქვს. ვირტუალური პირადი სერვერის შინაარსი შემდეგში მდგომარეობს: ერთი მძლავრი სერვერი იყოფა შედარებით პატარა ვირტუალურ სერვერებად, რომლებიც  ერთმანეთისგან აბსოლუტურად დამოუკიდებელი ელემენტები ხდებიან. ერთი კონკრეტული VPS სერვერის მუშაობა, გადატვირთვა ან რაიმე სახით დაზიანება არ ახდენს ზეგავლენას სხვა დანარჩენი ვირტუალური სერვერების მუშაობაზე. ამასთან,  შესაძლებელია მათი მომენტალური მოდიფიცირება- შეცვლა უფრო მაღალი ან დაბალი რესურსების მქონე პაკეტებით, გადატვირთვის გარეშე. ”ჯეონეთის” ჰოსტინგის მენეჯერის ეკა ნადირაშვილის განცხადებით, VPS-ის გამართვა მომხმარებლისათვის ძალზედ მარტივი და სწრაფი პროცედურაა, რადგან გამოყოფილი სერვერისგან განსხვავებით არ არის საჭირო  ოპერაციული სისტემის ინსტალაცია და მყარი დისკის ფორმატირება. ასევე შესაძლებელია ნებისმიერი დამატებითი პროგრამის ინსტალაციაც: ”VPS ჰოსტინგი საუკეთესო გადაწყვეტაა მათთვის, ვისაც საკუთარი სერვერი (Colocation) სჭირდება, მსხვილი პროექტებისათვის და ასევე ისეთი ორგანიზაციებისათვის, რომელთაც სურთ თავიანთი ინფორმაციის საიმედოდ შენახვა საკუთარ სერვერზე, დიდი მოცულობის ფაილების რეზერვაცია და ა.შ. ვირტუალური პირადი სერვერის შეძენით მომხმარებელს საშუალება ეძლევა დაზოგოს ფინანსური რესურსები, რადგან მისი ფასი ჩვეულებრივ სერვერთან შედარებით გაცილებით დაბალია”,-განმარტავს იგი.