იუსტიციის სამინისტროს საჯარო რეესტრის ეროვნული სააგენტოს თავმჯდომარემ, სოსო წიქარიშვილმა სკანირების ცენტრი გახსნა. სკანირების ცენტრი  თანამედროვე კომპიუტერული ტექნიკით და საოფისე ინვენტარითაა აღჭურვილი, რაც საჯარო რეესტრის ელექტრონული არქივის შექმნის პროცესს დააჩქარებს და მონაცემთა ერთიანი ბაზის სრულყოფას შეუწყობს ხელს. საჯარო რეესტრში შემოსული დოკუმენტები, სკანირების შემდეგ, ერთიან მონაცემთა ბაზაში თავსდება. ამის პარალელურად მიმდინარეობს არქივში დაგროვილი დოკუმენტების ელექტრონულ არქივში გადატანა. როგორც სააგენტოში აცხადებენ, საჯარო რეესტრის თანამშრომლებს თითქმის ყოველდღიურად უხდებათ საარქივო მასალასთან შეხება, რამაც შესაძლოა დროთა განმავლობაში მათი დაზიანება გამოიწვიოს. სწორედ ამიტომ გახდა აუცილებელი მათი ელექტრონულ ფორმატში შენახვა. ასევე ელექტრონული არქივის შექმნა  უძრავ ქონებაზე უფლების რეგისტრაციის პროცედურებს გაამარტივებს. საქართველოს მასშტაბით საჯარო რეესტრის ტექ-ბიუროს არქივში დაახლოებით 500 000 საქმეა დაცული. ელექტრონული არქივის ფორმირების დასრულებას საჯარო რეესტრი 2011 წლისთვის გეგმავს.