Tencent და Logitech პორტატულ ღრუბლოვან სათამაშო კონსოლს გამოუშვებენ

ბოლო რამდენიმე წლის განმავლობაში ღრუბლოვანი თამაშების სერვისები მნიშვნელოვნად გაფართოვდა და Logitech აპირებს წარმოადგინოს თავისი პორტატული მოწყობილობა სტრიმინგ თამაშებისთვის. შვეიცარიულმა კომპანიამ გამოაცხადა თანამშრომლობა ჩინურ ტექნოლოგიურ გიგანტ Tencent-თან, რათა შეიმუშაოს და გამოუშვას ღრუბელზე დაფუძნებული სათამაშო კონსოლი Logitech G ბრენდის ქვეშ. კონსოლი წლის ბოლომდე გამოვა.

Logitech ამბობს, რომ პორტატული მოწყობილობა მხარს დაუჭერს ღრუბლოვან სერვისების მთელ რიგს. კომპანია მოლაპარაკებებს აწარმოებს Xbox Cloud Gaming-თან და Nvidia GeForce Now-სთან ამ სერვისების კონსოლში მიტანის მიზნით. ამ დროისთვის უცნობია იქნება თუ არა მოწყობილობა Google Stadia-ს მხარდაჭერით.

Logitech არ ამხელს დეტალებს მოწყობილობის ოპერაციული სისტემის შესახებ. პუბლიკაციის ავტორი 9to5Google აღნიშნავს, რომ Android-ის შეცვლილი ვერსია ყველაზე აქტუალური იქნება პორტატული კონსოლისთვის.