კომპანია Proton-მა გაუშვა ხელოვნური ინტელექტის ბაზაზე შექმნილი ჩატბოტი Lumo, რომლის ფუნქციონალი მომხმარებლის მონაცემთა კონფიდენციალურობაზეა ორიენტირებული.
Proton-ში განაცხადეს, რომ ახალ ხელოვნური ინტელექტის ასისტენტს შეუძლია დოკუმენტების ანალიზი, კოდის წერა, წერილების შედგენა და სხვა ამოცანების შესრულება. ამასთან, მომხმარებლის ყველა მონაცემი ლოკალურად ინახება მათ მოწყობილობებზე.
Lumo-ს შეუძლია ქსელში ინფორმაციის მოძიებაც, თუმცა ეს ფუნქცია ნაგულისხმევად გამორთულია „მაქსიმალური კონფიდენციალურობისთვის“. მისი ჩართვის შემთხვევაში, ჩატბოტი პასუხებს მოიძიებს საძიებო სისტემებში, რომლებსაც Proton „კონფიდენციალურობის მიმართ მეგობრულად“ მიიჩნევს.
ასისტენტი მუშაობს რამდენიმე ღია კოდის მქონე ენობრივ მოდელზე, ჩატბოტის სერვერები ევროპაში მდებარეობს.
კომპანია მონაცემთა დასაცავად იყენებს „ნულოვანი წვდომის“ დაშიფვრას. მომხმარებლები იღებენ გასაღებს, რომლის მეშვეობითაც ხდება მონაცემების ნახვისთვის წვდომა. ეს ხელს უშლის ინფორმაციის მესამე პირების, მათ შორის თავად Proton-ის მიერ ნახვას. კომპანიაში აცხადებენ, რომ ამის წყალობით Proton ვერ შეძლებს მომხმარებლის მონაცემების გაზიარებას რეკლამის განმთავსებლებთან და მთავრობებთან, ასევე მათ გამოყენებას ენობრივი მოდელების განსავითარებლად.
Lumo კომპანიის მიერ პოზიციონირდება, როგორც უსაფრთხო და კონფიდენციალური ალტერნატივა მსხვილი ხელოვნური ინტელექტის კომპანიების გადაწყვეტილებების მიმართ: OpenAI-ის ChatGPT, Google-ის Gemini, Microsoft-ის Copilot და სხვა. Proton-ის ხელმძღვანელი ენდი იენი ამბობს, რომ მსხვილი ტექნოლოგიური კორპორაციები აგროვებენ მომხმარებლის მონაცემებს, აჩქარებენ სამყაროს გადასვლას „მეთვალყურეობის კაპიტალიზმზე“, მაშინ როდესაც Proton ცდილობს შექმნას ხელოვნური ინტელექტი, რომელიც ადამიანებს მოგებაზე მაღლა აყენებს.
