Apple-მა განაცხადა Vision Pro შერეული რეალობის ყურსასმენის მეორე თაობის შესახებ. მოწყობილობა ახლა M5 ჩიპზე მუშაობს. გარდა ამისა, მომხმარებლებისთვის ხელმისაწვდომი გახდა Dual Knit სამაგრი, რომელიც თავს ზემოდან და უკნიდან ამაგრებს.

ახალი პროცესორის წყალობით, ზოგიერთი სისტემური აპლიკაცია ახლა უფრო სწრაფად და ზუსტად მუშაობს. მაგალითად, ეფექტი შესამჩნევია ჩვეულებრივი ფოტოების სივრცით ფოტოებად გადაქცევის ფუნქციაში. მესამე მხარის აპლიკაციების მუშაობა გაორმაგდა, თუკი შევადარებთ Vision Pro M4-ზე.

ყურსასმენის ეკრანის განახლების სიხშირე 120 ჰც-ია. გარდა ამისა, გამოსახულება უფრო დეტალური და მკაფიო გახდა. კომპანია აღნიშნავს, რომ ჩაშენებული OLED პანელები 10%-ით მეტ პიქსელს აჩვენებს. ახალი პროცესორის გარდა, Apple-მა R1 ჩიპიც დააინტეგრირა. ის პასუხისმგებელია მოწყობილობაში დამონტაჟებული 12 კამერის, 6 მიკროფონისა და 5 სენსორის მონაცემების დამუშავებაზე.

კომპანიამ იმუშავა Vision Pro-ს ავტონომიურობაზეც. ერთი დამუხტვით, ვიდეოს დაკვრის რეჟიმში, ყურსასმენი სამ საათამდე მუშაობს. ამასთანავე, მოწყობილობა 150 გრამით დამძიმდა და ახლა 800 გრამს იწონის. აკუმულატორი ჯერ კიდევ გარეა. ის უნდა დაუკავშირდეს კაბელით და ჩაიდოს ჯიბეში.

ყურსასმენის დიზაინი არ შეუცვლიათ. ამის ნაცვლად, კოლექციას დაემატა Dual Knit სამაგრი. ის თავს ზემოდან და უკნიდან ეჭირება. Vision Pro-ს პირველი თაობის მომხმარებლები უჩიოდნენ, რომ მოწყობილობა ძალიან მძიმეა და საკუთარი წონის გამო ნელ-ნელა სრიალებს. თავის ზედა ნაწილზე სამაგრი ამას უნდა აღკვეთდეს. სამაგრი პირველი თაობის ყურსასმენისთვისაც გამოდგება. მისი შეძენა 100 დოლარად არის შესაძლებელი.

M5-ზე მომუშავე Vision Pro-ს გაყიდვები 22 ოქტომბერს დაიწყება. ფასი — 3500 დოლარიდან 256 გბ მეხსიერების მქონე ვერსიისთვის. 1 ტბ ვერსია 3900 დოლარიდან ღირს.