ევროპული ორგანიზაციები, ამერიკის შეერთებულ შტატებთან მზარდი დაძაბულობის ფონზე, საკუთარი სოციალური მედია პლატფორმის, W-ს, გაშვებას აპირებენ.
დანიური საინფორმაციო გამოცემა Politiken.dk იტყობინება, რომ ახალი პლატფორმა, W, მოითხოვს იდენტიფიკაციასა და ფოტოს ვერიფიკაციას, რათა დარწმუნდეს, რომ მომხმარებლები ნამდვილად ადამიანები არიან და სწორედ ისინი არიან, ვისადაც თავს ასაღებენ.
სოციალური მედია პლატფორმა W-ს შექმნის ინიციატივას მხარს უჭერს საკონსულტაციო საბჭო, ყოფილი მინისტრები და ბიზნესის წარმომადგენლები, ძირითადად შვედეთიდან.
ანა ზეიტერმა, W-ს აღმასრულებელმა დირექტორმა, Bilanz.ch-ს განუცხადა, რომ W ნიშნავს „ჩვენ“ (We). ამასთანავე, ორი V, რომლისგანაც W შედგება, ნიშნავს „ღირებულებებს“ (Values) და „ვერიფიცირებულს“ (Verified).
„ის ფაქტი, რომ ანბანში W წინ უსწრებს X-ს, ნამდვილად სასიამოვნო დამთხვევაა“, – აღნიშნა ზეიტერმა.
W-ს მონაცემები დეცენტრალიზებულად განთავსდება ევროპაში, ევროპული კომპანიების მიერ, და პლატფორმა დაიცავს ევროკავშირის მონაცემთა დაცვის მკაცრ კანონებს.
„თუ პოლიტიკური ბრიუსელი X-ის ნაცვლად W-ზე დაიწყებს პოსტვას, ჩვენ უკვე ბევრს მივაღწევთ“, – დასძინა მან Bilanz.ch-თან ინტერვიუში.
LinkedIn-ის პოსტში, სადაც მან W-ს გაშვების შესახებ გამოაცხადა, ზეიტერმა ხაზი გაუსვა, რომ სისტემური დეზინფორმაცია ანადგურებს საზოგადოების ნდობას და ასუსტებს დემოკრატიულ გადაწყვეტილებების მიღების პროცესს.
https://www.linkedin.com/embed/feed/update/urn:li:share:7418790849725206528?collapsed=1
„ჩვენ გვჯერა, რომ არსებობს გადაუდებელი საჭიროება ახალი სოციალური მედია პლატფორმისა, რომელიც აშენებული, მართული და ჰოსტინგი განთავსებული იქნება ევროპაში. მის საფუძველში იქნება ადამიანის ვერიფიკაცია, სიტყვის თავისუფლება და მონაცემთა კონფიდენციალურობა“, – დაწერა მან.
Washington Post-ის რეპორტიორმა იშან თარურმა გააზიარა W-ს შესავალი ვიდეოს კადრი, რომელიც წარმოდგენილი იყო დავოსში, მსოფლიო ეკონომიკურ ფორუმზე გამართულ სადებიუტო ღონისძიებაზე.
ეს განცხადება აშშ-სა და ევროპულ ქვეყნებს შორის გაზრდილი დაძაბულობის ფონზე გაკეთდა.
პრეზიდენტმა დონალდ ტრამპმა ახლახან გამოაცხადა ტარიფების ახალი ტალღა რამდენიმე ევროპული ქვეყნისთვის იმის გამო, რომ ისინი ეწინააღმდეგებიან მის გეგმას გრენლანდიის ყიდვის ან სამხედრო ძალით ანექსიის შესახებ. გრენლანდია დანიის სამეფოს ნაწილია.
აშშ-ის სოციალური მედიის კომპანიები დიდი ხანია ადანაშაულებენ ევროპელ რეგულატორებს მათზე უსამართლო თავდასხმებსა და ცენზურის დაწესებაში.
ევროკავშირი, რომელსაც მსოფლიოში ერთ-ერთი ყველაზე მკაცრი რეგულაციები აქვს, აცხადებს, რომ მისი მიზანია მომხმარებლების დაცვა და პლატფორმების ანგარიშვალდებულების გაზრდა.
ილონ მასკის X არის დიდი ტექნოლოგიური კომპანიებისა და ბრიუსელის დაპირისპირების ცენტრში. მას შემდეგ, რაც პლატფორმა 120 მილიონი ევროთი (140 მილიონი დოლარი) დაჯარიმდა ევროპის ციფრული მომსახურების აქტის გამჭვირვალობის წესების დარღვევის გამო, მასკმა ბლოკის გაუქმებისკენ მოუწოდა.
X აღარ არის საჯარო სივრცე
ორშაბათს ევროპარლამენტის 54-მა წევრმა მოითხოვა ევროპული ალტერნატივები დომინანტური სოციალური მედია პლატფორმებისთვის.
მათი მტკიცებით, მას შემდეგ, რაც კომპანია მასკმა იყიდა, „X აღარ არის ღია და დაბალანსებული ინსტრუმენტი პოლიტიკური კომუნიკაციისა თუ ჟურნალისტიკისთვის“.
„ეს არ არის ‘საჯარო სივრცე’ – ის ახლა უფრო ჰგავს დიპფეიკ პორნოგრაფიულ ვებსაიტს და თავად მასკის ცალმხრივი მაუწყებლობის სისტემას“, – დაწერეს მათ ევროკომისიის პრეზიდენტ ურსულა ფონ დერ ლაიენისადმი მიწერილ ღია წერილში.
ბოლო კვირების განმავლობაში X-მა ფართო დაგმობა დაიმსახურა, რადგან სოციალური პლატფორმა აივსო მისი ჩატბოტის, Grok-ის მიერ გენერირებული ციფრულად გაშიშვლებული ქალებისა და ბავშვების სურათებით.
