Samsung-მა Galaxy-ის დასაკეცი ეკრანებისთვის Flex Titanium ტექნოლოგია წარადგინა

Samsung Display-მ წარადგინა ახალი ტექნოლოგია Flex Titanium, რომელიც Galaxy-ის დასაკეცი სმარტფონების შემდეგ თაობაში იქნება გამოყენებული. კომპანიის განცხადებით, ეკრანის ახალი კონსტრუქცია მოწყობილობებს უფრო თხელსა და გამძლეს გახდის, ხოლო ეკრანზე ნაკეცის ხილვადობას საგრძნობლად შეამცირებს.

Flex Titanium-ის საფუძველია დისპლეის ახალი არქიტექტურა, რომელიც ტრადიციული პოლიმერული მასალების ნაცვლად ტიტანის ფენას, ასევე ეკრანის ქვეშ მოთავსებულ ტიტანის ფირფიტას იყენებს. ტიტანის მაღალი სიმტკიცის წყალობით, ინჟინრებმა შეძლეს კონსტრუქციის სისქის შემცირება და, ამავდროულად, სმარტფონის მრავალჯერადი დაკეცვისას წარმოქმნილი მექანიკური დატვირთვების მიმართ მისი მდგრადობის გაზრდა.

Samsung-ში აცხადებენ, რომ ეს ტექნოლოგია დასაკეცი მოწყობილობების განვითარების შვიდი თაობის შედეგია. კომპანიის მტკიცებით, გამძლეობის გაზრდის გარდა, ახალი კონსტრუქცია უზრუნველყოფს დისპლეის უფრო გლუვ ზედაპირს, რის წყალობითაც ნაკეცი გამოყენებისას ნაკლებად შესამჩნევი ხდება.

კომპანია ჯერჯერობით არ აქვეყნებს იმ მოწყობილობების სრულ სიას, რომლებიც Flex Titanium-ს მიიღებენ, თუმცა ადასტურებს, რომ ტექნოლოგია Galaxy-ის დასაკეცი სმარტფონების შემდეგ თაობაში გამოჩნდება. მოსალოდნელია, რომ დეტალები წარმოდგენილი იქნება უახლოეს ღონისძიებაზე Galaxy Unpacked, რომელიც 22 ივლისს გაიმართება.