Xreal-მა წარადგინა XR-სათვალე Aura Android XR-ითა და Gemini-ით

Xreal-მა და Google-მა დააანონსეს Aura — პირველი გაფართოებული რეალობის (AR) სათვალე Android XR-ის მართვით. ის აპლიკაციების ინტერფეისს გარემომცველ სივრცეზე ასახავს, რომელსაც მომხმარებელი გამჭვირვალე ლინზების მიღმა ხედავს.

მოწყობილობა აღჭურვილია Sony-ს Micro-OLED ეკრანებით, თითოეულ თვალზე 1920 × 1200 პიქსელის გარჩევადობითა და 70°-იანი ხედვის კუთხით. განახლების სიხშირე 120 ჰც-ს შეადგენს, ხოლო პიკური სიკაშკაშე — 1050 ნიტს. ლინზები მხარს უჭერს ელექტროქრომული დაბურვის ხუთ დონეს. ჩაშენებული კამერები კი თავისა და ხელების პოზიციას ადევნებს თვალს.

სათვალე დაახლოებით 95 გრამს იწონის, ხოლო გამოთვლებზე პასუხისმგებელია 265-გრამიანი ბლოკი. ის სათვალეს კაბელის საშუალებით უერთდება. გამოთვლითი ბლოკის საფუძველია Snapdragon Reality Elite-ის ჩიპი და 34,84 ვტ·სთ ტევადობის აკუმულატორი.

Aura-ში მომხმარებლებს შეუძლიათ საკუთარ გარშემო ხუთამდე ვირტუალური ეკრანი განალაგონ. შესაძლებელია Google Play-დან აპლიკაციების გაშვება, მათ შორის იმ 150-ის, რომლებიც უკვე სრულად ადაპტირებულია Android XR-ისთვის. სათვალესთან USB-C კაბელით ლეპტოპის დაკავშირებაც არის შესაძლებელი — მისი ეკრანი ცალკე ფანჯრის სახით გამოჩნდება სხვა გაშვებული აპლიკაციების გვერდით. ინტერფეისის მართვა შესაძლებელია ჟესტებით ან მაუსის, კლავიატურისა და გეიმპადის მეშვეობით.

Gemini-ზე დაფუძნებული ჩაშენებული ასისტენტი ფანჯრების შიგთავსთან მუშაობს. შეგიძლიათ მას გაშვებული აპლიკაციების შესწავლა და დანახულის ახსნა სთხოვოთ. გარდა ამისა, Gemini ოთახში არსებულ ობიექტებს ამოიცნობს და გამოკვეთს.

აშშ-ში Xreal Aura 12 გბ ოპერატიული მეხსიერებითა და 256 გბ საცავით 1100 დოლარი ღირს. 16/512 გბ ვერსია კი 1300 დოლარი დაჯდება. ეს ფასები 2026 წლის ბოლომდე იმოქმედებს, რის შემდეგაც ისინი შესაბამისად 1280 და 1500 დოლარამდე გაიზრდება. სათვალე იყიდება აშშ-ში, კანადაში, სამხრეთ კორეასა და იაპონიაში.