Nvidia-ს დირექტორთა საბჭომ შექმნა დამოუკიდებელი კომიტეტი და მოიწვია გარე იურისტები იმ ინფორმაციის შესამოწმებლად, რომელიც ჩინეთის სპეცსამსახურების მიერ კომპანიის გენერალური დირექტორის, ჯენსენ ჰუანგის გადაბირების შესაძლო მცდელობას ეხება. გამოძიების დაწყების საფუძველი გახდა The New York Times-სა და Financial Times-ში გამოქვეყნებული პუბლიკაციები, რომლებშიც ფიგურირებს სინგაპურელი მეწარმე ალისა ჰუანგი, რომელიც ტექნოლოგიური გიგანტის მოწინავე ჩიპებს ყიდულობდა. იდენტური გვარის მიუხედავად, იგი კორპორაციის ხელმძღვანელის ნათესავი არ არის.
აშშ-ის სპეცსამსახურების ინფორმაციით, ბიზნესვუმენი შესაძლოა ჩინეთის სახალხო რესპუბლიკის დაზვერვის ინტერესებიდან გამომდინარე მოქმედებდა. ჟურნალისტურ გამოძიებებში ასევე ნახსენებია მისი სავარაუდო რომანტიკული კავშირი Nvidia-ს ხელმძღვანელთან. თავად ჯენსენ ჰუანგმა ადრე განაცხადა, რომ მათი კონტაქტები მხოლოდ სამუშაო საკითხებით შემოიფარგლებოდა კომპანია Megaspeed-თან თანამშრომლობის ფარგლებში. გამოცემა NBC News ხაზს უსვამს, რომ ჯერჯერობით ვერ შეძლო ამ ცნობების დამოუკიდებელი დადასტურება.
Nvidia-ში ხაზს უსვამენ: მიმდინარე ეტაპზე არ არსებობს იმის რაიმე ნიშანი, რომ ამ ინციდენტს დახურული კორპორაციული ინფორმაციის ან აშშ-ის სახელმწიფო საიდუმლოების გაჟონვა მოჰყვა.
საჯარო სკანდალის ფონზე ჯენსენ ჰუანგმა კომპანიის თანამშრომლებს შიდა წერილი გაუგზავნა. მასში ხელმძღვანელმა აღიარა ცოლქმრული ღალატის ფაქტი, ბოდიში მოუხადა საკუთარ ოჯახს და სინანული გამოთქვა კოლექტივის, პარტნიორებისა და ინვესტორების წინაშე. ამასთან, Nvidia-ს ხელმძღვანელმა მუშაობის გაგრძელების პირობა დადო, ხოლო თავად კორპორაციაში დაადასტურეს, რომ ტოპ-მენეჯერი გენერალური დირექტორის პოსტს შეინარჩუნებს.
დავით მაჭახელიძე · 1 წთ საკითხავი
