დიდი ბრიტანეთის კონკურენციის სააპელაციო ტრიბუნალმა (Competition Appeal Tribunal, CAT) ცნო, რომ Apple ბოროტად იყენებდა თავის დომინანტურ მდგომარეობას, როდესაც აპლიკაციების შემქმნელებს უსამართლო საკომისიოს უხდიდა. ინსტანციის გადაწყვეტილებამ შესაძლოა აიძულოს ამერიკული კორპორაცია, ზიანის ანაზღაურების სახით ასობით მილიონი ფუნტი სტერლინგი გადაიხადოს.

CAT-მა Apple-ის წინააღმდეგ გადაწყვეტილება გამოიტანა დიდი ბრიტანეთის iPhone-ისა და iPad-ის მილიონობით მომხმარებლის სახელით შეტანილი სარჩელის განხილვის შემდეგ. სასამართლომ დაადგინა, რომ კომპანია 2015 წლის ოქტომბრიდან 2020 წლის ბოლომდე ბოროტად იყენებდა თავის დომინანტურ მდგომარეობას, აფერხებდა კონკურენციას აპლიკაციების დისტრიბუციის ბაზარზე და დეველოპერებისგან უსამართლო საკომისიოს იღებდა.

Apple-მა პირობა დადო, რომ გაასაჩივრებს სასამართლოს გადაწყვეტილებას, რომელიც „არასწორად ასახავს აპლიკაციების აყვავებულ და კონკურენტულ ეკონომიკას“.

ამ საქმეზე კომპენსაციის ოდენობამ შესაძლოა 1,5 მილიარდ ფუნტ სტერლინგს მიაღწიოს, მიაჩნიათ მოსარჩელეებს. ბრიტანელი მეცნიერი და სარჩელის ერთ-ერთი ინიციატორი რეიჩელ კენტი აცხადებს, რომ Apple-მა მიიღო „გადაჭარბებული მოგება“ აპლიკაციების გავრცელებისა და მათში შესყიდვების სფეროში ყოველგვარი კონკურენციის გამორიცხვით. მოსარჩელეები ამტკიცებენ, რომ Apple-ის მდგომარეობა საშუალებას აძლევს მას, აპლიკაციების შემქმნელებს მოახვიოს თავზე შემზღუდველი პირობები და გადაჭარბებული საკომისიოები — რასაც კომპანია უარყოფს.

ანალოგიური მიზეზების გამო, დიდ ბრიტანეთში პასუხისგებაში შეიძლება მიეცეს Google, რომელიც ასევე იღებს აპლიკაციების შემქმნელებისგან საკომისიოს Play Store-ზე წვდომისთვის. ამ საქმის განხილვა 2026 წლის ოქტომბერში დაიწყება. Microsoft-ს, Amazon-ს და სხვა ტექნოლოგიურ გიგანტებსაც შეიძლება შეექმნათ სარჩელები CAT-ში.