მიმდინარე კვირაში გამოქვეყნებული Private Cloud Compute-ის პროგრამული უზრუნველყოფის განახლების თანახმად, Apple იწყებს M5 ჩიპების გამოყენებას თავის ღრუბლოვან სერვერებში. ეს სწორედ ის ინფრასტრუქტურაა, რომელიც Apple Intelligence-ის “ქლაუდზე” დაფუძნებულ ფუნქციებს კვებავს.
ახალი აგენტური არქიტექტურა
დოკუმენტაციაში ნახსენებია “Private Cloud Compute Agent Worker”, რომელიც მუშაობს iOS-ის სპეციალურ ვერსიაზე და იყენებს ახალ აგენტურ არქიტექტურას AI მოთხოვნების დასამუშავებლად. კოდი, რომელიც ამ ახალ სისტემასთან ურთიერთქმედებს, უკვე აღმოჩენილია iOS 26.4-ში.
ცნობილია, რომ ახალი არქიტექტურა მუშაობს აპარატურაზე მოდელის ნომრით J226C, რომელსაც M5 ჩიპი ამოძრავებს.
დეტალები ჯერჯერობით მწირია, მაგრამ ეს აშკარა მტკიცებულებაა, რომ Apple აგრძელებს თავისი ღრუბლოვანი ინფრასტრუქტურის დახვეწას უფრო მოწინავე Siri-სა და Apple Intelligence ფუნქციების მოლოდინში. ცვლილებები ასევე მოჰყვა Apple-ის გარიგებას Google-თან, რაც გულისხმობს Gemini მოდელების გამოყენებას Siri-ს ფუნქციების გასაძლიერებლად.
M2 Ultra-დან M5-მდე
ისტორიულად, Apple-ის Private Cloud Compute სერვერები იყენებდნენ M2 Ultra ჩიპებს. M2 Ultra პირველად 2023 წლის ივნისში გამოვიდა, მას მოჰყვა M3 Ultra გასულ წელს. თუმცა, როგორც ჩანს, Apple-მა გამოტოვა M3 და M4 Ultra ჩიპების მასობრივი დანერგვა PCC არქიტექტურაში და პირდაპირ M5-ზე გადადის.
გარდა ამისა, ვრცელდება ინფორმაცია, რომ Apple მუშაობს სპეციალიზებულ AI სერვერულ ჩიპებზეც. ანალიტიკოს მინგ-ჩი კუოს ცნობით, ამ ჩიპების მასობრივი წარმოება 2026 წლის მეორე ნახევარში დაიწყება, ხოლო მათი ოფიციალური დანერგვა 2027 წელს იგეგმება.
წყარო: 9to5Mac
