Google-მა Maps-ის ყველაზე მასშტაბური განახლება წარადგინა

Google-მა წარადგინა ავტომობილის ნავიგაციის ყველაზე მასშტაბური განახლება რუკებში ბოლო ათი წლის განმავლობაში. “იმერსიული ნავიგაციის” (Immersive Navigation) ახალი რეჟიმი ნაცნობ ბრტყელ რუკას გარემოს სამგანზომილებიანი გამოსახულებით ანაცვლებს, ხოლო ჩაშენებული ჩატბოტი Gemini საშუალებას გაძლევთ დასვათ კითხვები მარშრუტისა და საინტერესო ობიექტების შესახებ ბუნებრივ ენაზე.

გზის ორგანზომილებიანი სქემის ნაცვლად, Google Maps ახლა მოცულობითად გამოსახავს შენობებს, ესტაკადებსა და სხვა ორიენტირებს. Google მიიჩნევს, რომ სამგანზომილებიანი ხედი მძღოლებს დაეხმარება უკეთ ორიენტირდნენ უცნობ გზებზე, განსაკუთრებით რთულ საგზაო კვანძებში. კულისებს მიღმა Gemini-ს მოდელები მუშაობენ – ისინი წყვეტენ, რომელი ელემენტები გამოკვეთონ და რომელი მოაშორონ, რათა ეკრანი არ გადაიტვირთოს.

სისტემა იყენებს მონაცემებს Street View-ს ბაზიდან და აეროფოტოებს. ხელოვნური ინტელექტის მოდელები დამოუკიდებლად განსაზღვრავენ, როდის ღირს ქვეითთა გადასასვლელის, შუქნიშნის ან “Stop” ნიშნის გამოკვეთა, რათა მძღოლმა საჭირო გასასვლელი ან მოხვევი არ გამოტოვოს.

ხმოვანი მითითებებიც უფრო “ჭკვიანი” გახდა და უფრო ბუნებრივად ჟღერს. მაგალითად, ავტომაგისტრალზე მოძრაობისას ასისტენტმა შეიძლება თქვას: “გაიარეთ ეს გასასვლელი და მოუხვიეთ შემდეგზე” – ნაცვლად იმისა, რომ გზის უცნობი დასახელება წარმოთქვას.

განახლება შეეხო ალტერნატიულ მარშრუტებთან მუშაობასაც. ახლა, როდესაც აპლიკაცია შემოვლით გზას გვთავაზობს, ის დეტალურად განმარტავს კომპრომისებს – მაგალითად, გზა მეტ დროს წაიღებს, მაგრამ ნაკლები საცობი იქნება. მგზავრობის დაწყებამდე Maps ასევე აჩვენებს დანიშნულების ადგილის პრევიუს Street View-ს მეშვეობით და გირჩევთ, სად დააპარკინგოთ.

განახლების მეორე ნაწილია ჩატბოტ Gemini-ს ინტეგრაცია პირდაპირ აპლიკაციაში. ახალი ღილაკი “ჰკითხე რუკებს” (Ask Maps) საშუალებას გაძლევთ შეიყვანოთ მოთხოვნები ჩვეულებრივ ენაზე. Google გვთავაზობს სცენარს, რომელიც ადრე ათეულობით მიმოხილვის შესწავლას მოითხოვდა: მაგალითად, ისეთი კაფეს პოვნა, სადაც არის ტელეფონის დამტენი და სწრაფი მომსახურება.

Gemini დაამუშავებს მოთხოვნას Maps-ის მთელი მონაცემთა ბაზის გამოყენებით და მოგცემთ პერსონალიზებულ შედეგებს ადრე შენახული და მოძებნილი ადგილების საფუძველზე. ჩატბოტის პასუხებიდანვე შეგიძლიათ პირდაპირ დაჯავშნოთ რესტორანი ან შეინახოთ ლოკაცია.

სამგანზომილებიანი ნავიგაციის გავრცელება აშშ-ში მომხმარებლებში უკვე დაიწყო. უახლოეს თვეებში რეჟიმი გამოჩნდება Android-სა და iOS-ზე, ასევე CarPlay-ში, Android Auto-სა და ჩაშენებული Google-ის მქონე ავტომობილებში.

ფუნქცია “ჰკითხე რუკებს” ხელმისაწვდომია მობილურ მოწყობილობებზე აშშ-სა და ინდოეთში, კომპიუტერის ვერსია კი მალეა მოსალოდნელი.

წყარო