გუნდო,
დღეს ჩემი ბოლო დღეა Apple-ის გენერალური დირექტორის პოსტზე. ეს არის მომენტი, რომლის დადგომაც ყოველთვის ვიცოდი, რომ ერთ დღეს მოვიდოდა, თუმცა მაინც ძნელი დასაჯერებელია, რომ ეს დღე დადგა და მე ამ სიტყვებს ვწერ. მე მიყვარს ეს კომპანია და მის უკან მდგარი გუნდი და არ შემეძლო ეს დღე ისე გამეშვა, რომ თქვენთვის წერილი არ გამომეგზავნა — მეთქვა, თუ რამდენად მადლიერი ვარ იმ უდიდესი სითბოსთვის, რომელსაც ჩემ მიმართ იჩენდით, თქვენი ყოველდღიური თავდადებისთვის და, რაც მთავარია, მთელი ცხოვრების იმ პრივილეგიისთვის, რასაც თქვენს ლიდერად ყოფნა ერქვა.
სიმართლე ისაა, რომ რაც არ უნდა ითქვას ჩემს წარმატებაზე, ვიცი, რომ ეს ყველაფერი თქვენი დამსახურებაა. თქვენ ჩემში საუკეთესო გამოავლინეთ. მთელი ჩემი ცხოვრების მანძილზე არსად მინახავს და არ ვყოფილვარ ადამიანთა ასეთ არაჩვეულებრივ გუნდთან ერთად, და ამის უფრო და უფრო მეტ მაგალითს ყოველდღე ვხედავ.
Apple-ში ნამდვილად არის რაღაც განსაკუთრებული. ყველაზე მეტად ვამაყობ იმით, რასაც ვერცერთი წლიური ანგარიში ვერასდროს ასახავს. ეს ადგილი იმის დასტურია, რომ კულტურა ყველაფერზე იმარჯვებს. ჩვენ გვაერთიანებს რწმენა, რომ ის, რასაც ვქმნით, მნიშვნელოვანია და რომ გვაქვს როგორც შესაძლებლობა, ისე პასუხისმგებლობა, სამყარო იმაზე უკეთესი დავტოვოთ, ვიდრე დაგვხვდა. ეს მიზანი იმის ნაწილია, რაც ამ ადგილს არაჩვეულებრივს ხდის. Apple ხელს უწყობს მის გაღვივებას, თუმცა მჯერა, რომ ის თითოეულ თქვენგანში ჯერ კიდევ აქ მოსვლამდე ცოცხლობდა.
სწორედ ამან მოგიყვანათ ამ კომპანიაში და ეს არის ის, რაც ყოველდღიურად თქვენს საქმიანობას წარმართავს. ჩვენ ერთად შევქმენით რაღაც ბევრად უფრო დიდი, ვიდრე რომელიმე ჩვენგანს მარტო შეეძლო წარმოედგინა ან მიეღწია. და სწორედ ეს არის ჩვენი წარმატების საიდუმლო. ჩვენ ერთმანეთში საუკეთესოს ვავლენთ. ჩვენ ერთმანეთს წინსვლაში ვეხმარებით. ჩვენ შევძელით, ჩვენი კვალი დაგვეტოვებინა სამყაროში („dent in the universe“), როგორც ამას ოდესღაც სტივი აღწერდა — იმის გამო, თუ ვინ ვართ და რისი გვწამს, რას ვაფასებთ და როგორ ვხედავთ სამყაროს. რა ბედნიერები ვართ. რა ბედნიერი ვარ მე.
როგორც იცით, მე არ ვტოვებ Apple-ს. მაგრამ ვტოვებ როლს, რომელიც მთელი გულით მიყვარდა. ეს საქმე ისე მომენატრება, როგორც მხოლოდ ახლა თუ წარმომიდგენია, თუმცა ჩემს გადაწყვეტილებასთან სრულ სიმშვიდეში ვარ. მომენატრება თქვენი წინამძღოლობა და ყოველ ნაბიჯზე თქვენ გვერდით ყოფნა, თუმცა უდიდეს შვებას მანიჭებს საჭის გადაცემა ისეთი ბრწყინვალე, საოცარი და უნარიანი ადამიანისთვის, როგორიც ჯონია. ცოტას თუ ესმის ჯონივით, რას მოითხოვს ისეთი პროდუქტების შექმნა, რომლებიც სამყაროს ცვლის, და უაღრესად მოხარული ვარ მისი ლიდერობის გამო.
იმედი მაქვს, იცით, რამდენად გაფასებთ და რა დიდი პატივი იყო, ვყოფილიყავი თქვენი გენერალური დირექტორი. უპირველეს ყოვლისა, იმედი მაქვს, კვლავაც იამაყებთ იმით, რომ ხართ ამ შესანიშნავი ადგილის ნაწილი, რომელსაც Apple-ს ვუწოდებთ, და ყოველთვის მაქსიმუმს გაიღებთ მისთვის. როდესაც ამ საქმეში მთელ ჩვენს არსებას ვდებთ, ერთმანეთზე და იმ ადამიანებზე ზრუნვით, ვისაც ვემსახურებით, არ არსებობს საზღვარი იმისა, თუ რაოდენ ღრმა ცვლილების მოხდენა შეგვიძლია.
მოუთმენლად ველი თქვენთან შეხვედრას ჩემს ახალ როლში Apple Park-ში და მთელ მსოფლიოში.
მთელი ჩემი არსებითა და გულით, ყოველთვის
თქვენი,
ტიმი
კუკი, რა თქმა უნდა, მართალია, რომ ის Apple-ს არ ტოვებს. ამის ნაცვლად, ის კომპანიის აღმასრულებელი ხელმძღვანელი ხდება — როლი, რომელიც შეიძლება განისაზღვროს ისე, როგორც ეს ჯონ ტერნუსს დასჭირდება.
ცხადია, შეგვიძლია ველოდოთ, რომ, მაგალითად, ტრამპთან ურთიერთობას კვლავინდებურად ტიმ კუკი გააგრძელებს. შესაძლოა, ისევ მან გამოაცხადოს ხოლმე სტიქიით დაზარალებულთა დახმარებისთვის Apple-ის მიერ თანხების გამოყოფის შესახებაც.
მიუხედავად ამისა, კუკის ეპოქა დასრულდა და ტერნუსის ერა დაიწყო. ორივე მათგანი სწორი ადამიანი იყო სწორ დროს.
