Microsoft-მა Xbox Nano Controller წარადგინა

Microsoft-მა უსადენო გეიმპადის კომპაქტური მოდელი, Xbox Nano Controller წარადგინა. 50 დოლარის ღირებულების კონტროლერი შექმნილია „პატარა მოთამაშეების, მცირე ზომის ხელების მქონე ადამიანების ან იმ პირთა საჭიროებების გათვალისწინებით, ვინც გზაში სათამაშოდ პორტატიულ მოწყობილობას ეძებს“. ახალი მოწყობილობა შესაძლოა Xbox Wireless Controller-ისა და Xbox Elite Wireless Controller-ის ალტერნატივად იქცეს, რომლებიც 65 და 150 დოლარად იყიდება.

Xbox Nano Controller-ის სიგანე 127 მმ-ია და 100 გრამს იწონის. შედარებისთვის, Xbox Wireless და Xbox Elite გეიმპადების სიგანე 152 მმ-ია, ხოლო მათი წონა დაახლოებით 283 და 340 გრამს შეადგენს. მცირე ზომის მიუხედავად, სიახლე ყველა 18 სტანდარტულ ღილაკს მოიცავს. სხვა Xbox-ის გეიმპადებისგან განსხვავება მხოლოდ ფორმ-ფაქტორში მდგომარეობს.

ახალი გეიმპადი აღჭურვილია აკუმულატორით, რომლის დატენვაც შესაძლებელია USB-C კაბელით. გეიმპადი ასევე უერთდება კომპიუტერს, მობილურ მოწყობილობებსა და სმარტ ტელევიზორებს Bluetooth-ის საშუალებით. Microsoft გვპირდება Xbox One-ის, Xbox Series X/S-ის, PC-ზე Xbox-ის, Windows-ის, Android-ისა და iOS-ის მხარდაჭერას.

Xbox Nano-ს მიწოდება 2026 წლის 4 ნოემბერს დაიწყება, მწარმოებელმა წინასწარი შეკვეთების მიღება უკვე დაიწყო. კონტროლერი ხელმისაწვდომია მხოლოდ თეთრ ფერში. თითოეულ მომხმარებელს ერთი შეკვეთით მხოლოდ ხუთამდე გეიმპადის შეძენა შეუძლია — ამ გზით Microsoft გადამყიდველებთან ბრძოლას ცდილობს.

2024 წლის გაზაფხულზე Microsoft-მა შეზღუდული შესაძლებლობის მქონე მოთამაშეებისთვის განკუთვნილი გეიმპადი Proteus წარადგინა. კონტროლერი Byowave-მა Designed by Xbox-ის გუნდთან თანამშრომლობით შეიმუშავა.

წყარო: Habr — Travis_Macrif