Apple MacBook Pro PROLED XDR ეკრანით — კომპანიის პირველი სენსორული Mac

Apple-მა ოფიციალურად წარადგინა სრულიად ახალი MacBook Pro PROLED XDR ეკრანით, რომელიც კომპანიის პირველი სენსორული ლეპტოპია.

ახალ მოწყობილობაზე Apple-მა პირველად მიანიშნა 19 ოქტომბერს, კომპანიის ღონისძიების „Pro and tell“ ტიზერით. დღეს კი Apple-ის ახალმა აღმასრულებელმა დირექტორმა (CEO), ჯონ ტერნუსმა, ლეპტოპის კიდევ ერთი „spotlight“ ტიზერი გააზიარა.

გაეცანით სტატიას ახალი პრემიუმ-კლასის ლეპტოპის ყველა დეტალის გასაგებად…

MacBook Pro-ს დეტალები

ახალ მოწყობილობას აქვს მანათობელი Apple-ის ლოგო, ტანდემური OLED (tandem OLED) და სენსორული ეკრანი.

ის მუშაობს M5 Pro და M5 Max ჩიპებზე, ისევე როგორც MacBook Pro-ს არსებული მოდელები OLED სენსორული ეკრანის გარეშე.

ჯონ ტერნუსმა, რომელმაც ახალ Mac-თან ერთად გადაღებული ახალი პროფილის ფოტო დააყენა, მოწყობილობის პირველი კადრები X-ზე გააზიარა:

Apple წლების განმავლობაში იყენებდა მანათობელ ლოგოს საკუთარ ნოუთბუქებში, ვიდრე 12-დუიმიანი MacBook და 2016 წლის MacBook Pro გამოვიდოდა.

ახალი ლეპტოპის ფასი 14-დუიმიანი მოდელისთვის 2899 დოლარიდან იწყება, ხოლო 16-დუიმიანი ვერსიის საწყისი ფასი 3399 დოლარია.

წინასწარი შეკვეთები დღეიდანაა ხელმისაწვდომი, ხოლო მიწოდება 6 ნოემბრიდან დაიწყება. ახალი MacBook Pro-ს პროდუქტის გვერდის ნახვა შეგიძლიათ აქ.

ფერებში წარმოდგენილია ვერცხლისფერი (silver) და კოსმოსური შავი (space black) ოფციები, ეკრანის სტანდარტული ან ნანო-ტექსტურული (nano-texture) კონფიგურაციით.

ახალი პრემიუმ ლეპტოპის გარდა, Apple-მა ამ კვირაში ასევე წარადგინა განახლებული დიზაინის iPad mini, M6 iMac-ი და M6 ჩიპზე მომუშავე 14-დუიმიანი MacBook Pro. ჯერ კიდევ მარტში, Apple-მა სტანდარტული 14 და 16-დუიმიანი MacBook Pro ლეპტოპები არსებულ M5 Pro და M5 Max ჩიპებზე განაახლა.

Apple-ის განცხადებით, ახალი დიზაინი უფრო თხელი და მსუბუქია, ვიდრე იმავე ზომის კონფიგურაციის სტანდარტული MacBook Pro მოდელები.

პირველი Mac-ი სენსორული მართვით

ახალი MacBook Pro პირველია, რომელიც იყენებს Apple-ის მიერ წოდებულ PROLED XDR ეკრანს, რომელმაც MacBook Pro-ს ეკრანის ტექნოლოგიაში Mini-LED ჩაანაცვლა.

მაშინ როცა Apple-მა iPhone-სა და iPad-ში მრავალმხრივი შეხების (multi-touch) ინოვაცია დანერგა, Mac-ი წლების განმავლობაში ეწინააღმდეგებოდა სენსორულ მართვას. ახალი MacBook Pro ამას Mac-ის პირველი სენსორული ეკრანით ცვლის. აი, რას ამბობს Apple Mac-ზე სენსორული მართვის შესახებ:

MacBook Pro-ს პირველად აქვს Touch მხარდაჭერა, რაც პროფესიონალებს კონტენტთან ურთიერთქმედების სრულიად ახალ შესაძლებლობას სთავაზობს. სპეციალურად Mac-ისთვის შექმნილი ყოველი შეხება წარმოუდგენლად სწრაფი რეაგირებისა და დახვეწილია. ყოველდღიური დავალებები მარტივი და ინტუიციურია: მომხმარებლებს შეუძლიათ ვებგვერდის გადახვევა ბუნებრივი გასმით; ფოტოს მოახლოება თითების მოძრაობით; სლაიდების გადატანა ერთი პრეზენტაციიდან მეორეში; და ფანჯარაზე ორმაგი შეხება მის სრულ ეკრანზე გასაშლელად, ან სწრაფი გასმა გვერდიგვერდ განსათავსებლად. გარდა ამისა, სენსორი უშუალოდ დისპლეის პანელშია ჩაშენებული და არა მასზე დატანილი, რაც აყოვნებას ამცირებს და მომხმარებელს უჩენს განცდას, რომ პირდაპირ თავად კონტენტს ეხება.

Apple ასევე ხაზს უსვამს MacBook Pro-ში გამოყენებულ ახალ საკინძების (hinge) ტექნოლოგიას, რაც ნაწილობრივ სენსორული შეყვანის მხარდასაჭერად შეიქმნა სტაბილურობის შელახვის გარეშე:

Touch ასევე სრულიად ახალ სამუშაო შესაძლებლობებს უხსნის პროფესიონალ მომხმარებლებს. გრაფიკულ დიზაინერებს უკვე შეუძლიათ მთელი ეკრანი გამოიყენონ სამუშაო ტილოდ და ხატვისას აღარ იყვნენ შეზღუდულნი თრექპედის არეალით; მუსიკოსებს შეუძლიათ პროგრამული ინსტრუმენტებით პირდაპირ ეკრანზე დაუკრან; ხოლო აპლიკაციების დეველოპერებს — გამოსცადონ, როგორ მუშაობს Touch მათი iOS და iPadOS აპლიკაციებისთვის პირდაპირ MacBook Pro-ს ეკრანზე. Mac-თან ურთიერთქმედების ეს ახალი გზები სრულ ჰარმონიაში მუშაობს კლავიატურის იმ მალსახმობებსა და თრექპედის ჟესტებთან, რომლებსაც პროფესიონალები კარგად იცნობენ და უყვართ. გარდა ამისა, ახალი დიზაინის საკინძი უზრუნველყოფს მეტ სტაბილურობას შეხებისას, ხოლო ვიდეოს გაუმჯობესებული სტაბილიზაცია ავტომატურად, რეალურ დროში ასწორებს კამერის გამოსახულებას ვიდეოზარის დროს ეკრანზე შეხებისას.

გარდა სენსორული შეყვანისა, ახალმა MacBook Pro-მ ჭრილის (notch) ნაცვლად Dynamic Island-იც მიიღო.

Dynamic Island უკვე Mac-ზეც ხელმისაწვდომია და Spotlight-ის, Live Activities-ისა და Siri AI-ს ერთიან სივრცეს წარმოადგენს.

არ გაინტერესებთ სენსორული მართვა? მარტის MacBook Pro-ს არსებული კონფიგურაციები კვლავ გაყიდვაში რჩება იგივე ფასად. თქვენ უბრალოდ დაკარგავთ OLED-ს, მანათობელ Apple-ის ლოგოს და უფრო თხელ და მსუბუქ დიზაინს. თუმცა, წარმადობა ვერსიებს შორის პრაქტიკულად იდენტურია, რადგან ორივე M5 Pro და M5 Max ჩიპებს გვთავაზობს.

ახალი ლეპტოპების კონფიგურაცია შესაძლებელია 128 გბ-მდე გაერთიანებული მეხსიერებით (unified memory) და 16 ტბ-მდე მყარი დისკის (SSD) საცავით.

ეკრანის მაქსიმალური სიკაშკაშე HDR კონტენტისთვის 1600 ნიტიდან 2000 ნიტამდე გაიზარდა.

14-დუიმიანი მოდელი ნახევარი ფუნტით (დაახლოებით 227 გრამით) მსუბუქია და ზუსტად 3 ფუნტს (დაახლოებით 1.36 კგ) იწონის, წინა დიზაინის იმავე ვერსიის 3.5 ფუნტთან შედარებით. შემცირებულია მისი საერთო გაბარიტებიც: 14-დუიმიანი მოდელების შედარებისას ზომებია 0.59 x 12.24 x 8.52 დუიმი, წინა მოდელის 0.61 x 12.31 x 8.71 დუიმთან შედარებით.

საგრძნობლად მსუბუქია 16-დუიმიანი მოდელიც. ახალი დიზაინი ზუსტად 4 ფუნტს (დაახლოებით 1.81 კგ) იწონის, წინა დიზაინის 4.7 ფუნტთან შედარებით. ზომები შეცვლილია 0.63 x 14 x 9.62 დუიმამდე, წინა 0.66 x 14.01 x 9.77 დუიმთან შედარებით.

ახალი მოწყობილობები კვლავ Touch ID-ს იყენებს და არ გააჩნია Face ID-ს მხარდაჭერა. Apple ასევე არ გვთავაზობს ახალი MacBook Pro-ს ჩაშენებული ფიჭური კავშირის (cellular) მქონე მოდელებს. ასე რომ, Face ID-სა და ჩაშენებულ მობილურ ინტერნეტზე ლოდინი კვლავ მოგვიწევს.

ახალი მოწყობილობების შესახებ Apple-ის ოფიციალური პრესრელიზის ნახვა შეგიძლიათ აქ.

წყარო: 9to5Mac — Zac Hall