NVIDIA-მ და ფარმაცევტულმა გიგანტმა Eli Lilly-მ ხუთი წლის განმავლობაში 1 მილიარდ დოლარამდე ინვესტიციით ერთობლივი AI ლაბორატორიის შექმნის შესახებ გამოაცხადეს. ლაბორატორია სან-ფრანცისკოში განთავსდება და Lilly-ის ბიოლოგებსა და ქიმიკოსებს NVIDIA-ს ინჟინრებთან გააერთიანებს, რათა ხელოვნური ინტელექტის დახმარებით წამლების 24/7 რეჟიმში შემუშავება მოხდეს.
პროექტის საკვანძო იდეაა ექსპერიმენტების დახურული ციკლი, სადაც „სველი“ ლაბორატორიები რეალური ცდებით, გამოთვლით „მშრალ“ ლაბორატორიებთან ერთად იმუშავებენ. AI აგენტები ექსპერიმენტებს 24/7 რეჟიმში ჩაატარებენ, დააგენერირებენ მონაცემებს და დაატრენინგებენ მოდელებს, რომლებიც შემდეგ მომდევნო ექსპერიმენტებს წარმართავენ. პლატფორმა გახდება NVIDIA BioNeMo, ხოლო გამოთვლები ახალი თაობის Vera Rubin-ის არქიტექტურაზე შესრულდება.
ინფრასტრუქტურა ეყრდნობა Lilly-ის სუპერკომპიუტერს, რომელიც 2025 წლის შემოდგომაზე დაანონსდა. 1016 Blackwell Ultra GPU-ზე დაფუძნებული სისტემა, რომლის წარმადობაც 9 ეგზაფლოპზე მეტია, ყველაზე მძლავრია ფარმაცევტულ ინდუსტრიაში. მოლეკულების ძიების გარდა, პარტნიორები გეგმავენ AI-ს გამოყენებას კლინიკურ კვლევებში, წარმოებასა და ლოჯისტიკაში. საწარმოო ხაზების ციფრული ტყუპები NVIDIA Omniverse-ში საშუალებას მისცემს მათ მოახდინონ მიწოდების ჯაჭვების მოდელირება და ოპტიმიზაცია რეალური ცვლილებების განხორციელებამდე.
„ხელოვნური ინტელექტი ტრანსფორმაციას ახდენს ყველა სფეროში, თუმცა არსად მისი გავლენა ისეთი ღრმა არ იქნება, როგორც სიცოცხლის შემსწავლელ მეცნიერებებში“, — განაცხადა NVIDIA-ს აღმასრულებელმა დირექტორმა ჯენსენ ჰუანგმა. Eli Lilly-ის ხელმძღვანელის, დევიდ რიქსის თქმით, კომპანიის მონაცემებისა და სამეცნიერო ექსპერტიზის გაერთიანებამ NVIDIA-ს გამოთვლით სიმძლავრეებთან „შესაძლოა წამლების შემუშავება თავიდან გამოიგონოს“. ლაბორატორია მუშაობას 2026 წლის მარტში დაიწყებს.
NVIDIA-სთვის ეს ფარმაცევტულ სექტორში ექსპანსიის გაგრძელებაა: კომპანია უკვე თანამშრომლობს AstraZeneca-სთან, GSK-სთან, Bristol-Myers Squibb-თან და Merck-თან. 2025 წლის ნოემბერში Eli Lilly გახდა პირველი კომპანია ჯანდაცვის სექტორში, რომლის კაპიტალიზაციამ 1 ტრილიონ დოლარს მიაღწია. NVIDIA-მ იმავე წელს პირველმა მიაღწია 5 ტრილიონი დოლარის ნიშნულს.
