Huawei-მ გამოაცხადა თავისი წამყვანი ხელოვნური ინტელექტის (AI) ჩიპების, Ascend 950-ის გაყიდვების დაწყების გეგმების შესახებ სამხრეთ კორეაში 2026 წელს. კომპანია, რომელიც ამერიკული სანქციების გამო მოწყვეტილია დასავლურ ტექნოლოგიებს, ახლა თავად შედის ბაზარზე, სადაც Nvidia დომინირებს. Huawei Korea-ს აღმასრულებელმა დირექტორმა, ბალიან ვანგმა, სეულში გამართულ ღონისძიებაზე Huawei Day 2025 განაცხადა: “ჩვენ გვინდა კორეულ კომპანიებს Nvidia-ს გარდა მეორე ვარიანტი შევთავაზოთ”.
Nvidia-სგან განსხვავებით, რომელიც ცალკეულ ამაჩქარებლებს ყიდის, Huawei შესთავაზებს მხოლოდ კლასტერულ კონფიგურაციებს Atlas SuperPod — კომპლექსურ გადაწყვეტილებებს ქსელური ინფრასტრუქტურითა და შენახვის სისტემებით. კომპანია ბაზარზე ერთდროულად ჩიპის ორ მოდიფიკაციას გამოიტანს: Ascend 950PR ინფერენსისა (inference) და სარეკომენდაციო სისტემებისთვის (128 გბ HBM, 1,6 ტბ/წმ გამტარუნარიანობა) და Ascend 950DT მოდელების სწავლებისთვის (144 გბ HBM, 4 ტბ/წმ გამტარუნარიანობა). ორივე ჩიპი იყენებს Huawei-ს საკუთარი წარმოების HBM მეხსიერებას — შესაბამისად HiBL 1.0-ს და HiZQ 2.0-ს. კომპანიის განცხადებით, Ascend 950-ზე დაფუძნებული კლასტერები კონკურენციას უწევს Nvidia Rubin-ის ხაზს, თუმცა დამოუკიდებელი ექსპერტები აღნიშნავენ, რომ წარმადობით Huawei ჯერ კიდევ ჩამორჩება ამერიკელ კონკურენტს.
სამხრეთ კორეა მხოლოდ პირველი ნაბიჯია. კორეული მედიის ინფორმაციით, Huawei მომავალ წელს მალაიზიის ბაზარზე გასვლასაც გეგმავს. ეს არის უფრო ფართო სტრატეგიის ნაწილი, რომელსაც Nvidia-ს აღმასრულებელი დირექტორი ჯენსენ ჰუანგი “AI-ს სარტყელსა და გზას” (Belt and Road for AI) უწოდებს — იმის მსგავსად, თუ როგორ უწევდა Huawei პოპულარიზაციას 5G მოწყობილობებს განვითარებად ბაზრებზე. სამხრეთ კორეა თავისი განვითარებული ტექნოლოგიური ინფრასტრუქტურით და ჩინეთთან დაძაბული ურთიერთობებით — არატრივიალური არჩევანია სტარტისთვის. სავარაუდოდ, Huawei იმედოვნებს იმ კომპანიების დაინტერესებას, რომლებიც დეფიციტის გამო ვერ იღებენ საკმარის Nvidia-ს ამაჩქარებლებს ან ეძებენ მომწოდებლების დივერსიფიკაციას.
მთავარი კითხვაა — ეყოფა თუ არა Huawei-ს საწარმოო სიმძლავრეები. კომპანია აშენებს მიწოდების მთელ ჯაჭვს ჩინეთის შიგნით, გვერდს უვლის რა ამერიკულ შეზღუდვებს, მაგრამ ეს გარდაუვალად აისახება მოცულობებზე. ამასთან, თავად ტოპ-ჩიპების ექსპორტის ფაქტი აჩვენებს, რომ Huawei სანქციების პირობებში გადარჩენის სტრატეგიიდან გადავიდა გლობალური AI-ინფრასტრუქტურის ბაზრის წილის მოპოვების მცდელობაზე.
